Lekcyi i Evanelii na niadzieli i śviaty (1938)/II/29
| ← 28. Na dzień Matki Boskaj Škaplernaj | 29. Na dzień śv. Hanny Урыўкі зь Бібліі 1938 год Пераклад: Адам Станкевіч |
30. Na dzień śv. Daminika → |
Прапануем да спампаваньня!
NA DZIEŃ ŚV. HANNY.
I.
Chto znajdzie mužnuju žančynu? Daloka i z apošnich hranic cana jaje. Daviaraje jej serca muža jaje i karyści patrabavać jon nia budzie. Nia zło, ale dabro jamu robić praz usie dni žyćcia svajho. Šukała voŭny i lonu i pracavała radaj ruk svaich. Stałasia, jak karabiel kupiecki, zdaloku viazučy chleb svoj. I ŭstavała ŭnočy i dała karyść damaŭnikom svaim. Ahladała pole i kupiła jaho, z pracy ruk svaich zasadziła vinahradnik. Mocaj apajasała biodry svaje i ŭzmacavała ruki svaje. Pakaštavała i ŭbačyła, što dobraja starannaść jaje: — nia zhaśnie ŭnočy śvietač jaje. Ruku svaju praciahnuła da spraŭ važnych, a palcy jaje ŭziali vieraciano. Ruku svaju adkryła patrabujučamu i dałoni svaje praciahnuła da ŭbohaha. Nia budzie jana bajacca ściužy śniežnaj dla domu svajho, bo ŭsie damaŭniki jaje adziety padvojna. Nakryćcio zrabiła sabie, bisier i purpur adzietak jaje. Muž jaje pavažany ŭ radzie, kali zasiadzie pamiž staršymi ziamli. Pałatna narabiła i pradała i pojas padała Chananejcu. Moc i krasa adzietak jaje i śmiajacca budzie ŭ dzień apošni. Vusny svaje adkryła, mudraści i zakon dabraty na jazyku jaje. Uvažała na ściežki domu svajho i chleba daremna nia jela. Ustali syny jaje i najščaśliviejšaj słavili i muž jejny chvaliŭ jaje. Mnoha dačok naźbirała bahaćcia: ty pieravysila ŭsich. Zdradnaja strojnaść i pustaja pryhožaść — žančyna, što Boha baicca — heta budzie słaŭlena. Dajcie jej z pładoŭ ruk jaje i niachaj jaje chvalać u bramach učynki jaje.
(Mudr. 31, 10—31).
II.
U heny čas skazaŭ Jezus svaim vučniam hetkuju prypovieść: vaładarstva niabiesnaje padobnaje da skarbu, schavanaha ŭ poli. Jak čałaviek znajdzie jaho, zakopvaje i z tej radaści idzie i pradaje ŭsio, što maje i kuplaje henaje pole. Tak-ža padobnaje vaładarstva niabiesnaje da čałavieka kupca, katory šukaje dobrych perłaŭ. Kali znajšoŭ adnu darahuju perłu, pajšoŭ i pradaŭ usio, što mieŭ i kupiŭ jaje. Jašče padobnaje vaładarstva niabiesnaje da nievada, zakinutaha ŭ mora i zachapiŭšaha ŭsiakaha rodu ryby. Kali jon napoŭniŭsia, vyciahnuli i, pasieŭšy na bierazie, vybrali dobruju ŭ pasudu, a drennuju vykinuli von. Hetak budzie pry skančeńni śvietu: vyjduć anioły i addzielać niahodnych spasiarod spraviadlivych i pašluć ich u pieč ahnistuju i tam budzie płač i skryhot zuboŭ. Ci zrazumieli vy ŭsio heta? Kažuć jamu: tak. Skazaŭ im: dziela taho kožny vučony, abznajomleny z vaładarstvam niabiesnym, padobny da čalavieka baćki siamji, katory z svajho skarbu dastaje i novaje i staroje.
(Mat. 13, 44—52).