Варта (1918)/Добрыя весьці

← Ясьне Вяльможнай Пані Арэшчысе

Добрыя весьці Верш Аўтар: Уладзіслаў Сыракомля Кастрычнік 1918 году

Малітва →

Іншыя публікацыі гэтага твора: Добрыя весьці (Сыракомля).

Прапануем да спампаваньня!

ДОБРЫЯ ВЕСЬЦІ.

Заходзіць сонцэ пагодняго лета,
І веіць вецяр з заходніх нябёс;
Здароў будзь, вецяр! з далёкаго сьвета
Добрыя-ж весьці да нас ты прынёс?
Здаровыя ж будзьця! эй, добрыя ж весьці:
Там, на заходзі, праліваюць кроў,
Бьюцца для славы, свабоды і чэсьці
І робяць вольных людзей з мужыкоў:
Гудзяць вясёла і песьні і танцы
У добрым жніве на шчасьлівы год.
Годзі вам, годзі, цары-паганцы,
Таптаць у балотах хрышчоны народ!
Годзі вам, годзі ў яснай карэці,
Годзі чыноўнікі ды езьдзіць у двор,
Годзі вам, годзі мужыцкія дзеці
З хаткі астаткі даваць на пабор.
І панская дзецка, і хамская юха
З аднэй кватэркі папіваюць мёд:
І прысягнулі навек, да абуха,
Быць сабе вольны і роўны народ.
Мужык і шляхціц засядзе на лаве,
Каб вясьці раду аб сваёй зямлі;
Як трэба думаць аб грамадзкай справе
На адно мейсца, як браты, прыйшлі. —
А як урадзім вайну на грамадзе
Бараніць дзеткі і зямлю, і дом:
Мужык і шляхціц на каня узсядзе,
Касіць касою, рубіць тапаром! —
Эй, згінець вораг, як Бог нам паможэ
За нашу крыўду, за горкі наш жаль, —
Запяем песьню: «Хваліць цябе, Божэ».
Лягчэй будзе сэрцу, — як згінець маскаль. —
Зямля ты наша, зямля ты Сьвятая,
Радзі нам збожа ды судзі пажаць! —
Не прыйдзе вораг з маскоўскаго краю
На магазын нашэ зерня браць! —
Ручыць рукою худоба ў хаце;
Паны мужыцкіх сьлёз не заберуць —
Мужык з панамі стаіць за пан-браце,
Рука за руку і грудзі за грудзь! —
Пяром на карце ды сахой на ніве
Адзін другому роўнасьць засьцярог:
Эй у свабодзі зажывём шчасьліве,
Мы будзем дзеткі, а нам бацькай — Бог!

1848 г.

Сырокомля (Людвік Кондратовіч).

Увага: Верш гэты быў ужо раз друкаваны у надзвычайна рэдкай цяпер брашурцы: «Hutarka staroho dzieda». Брашурка памечэна на апошняй страніцы: Paryż 1862 r. Lutego 27 (15) dnia. Друк, шрыфт і папера — кепскіе, што вызывало падазрэньня, ці па праудзі брашура друкавалася у Парыжы. Цяпер напэуна можэм устанавіць, што брашура друкавалася не у Парыжы, бо аб гэтым сьведчыць дата новаго і стараго стылю, чаго бы у Парыжы не зрабілі, апроч гэтаго брашуркі гэтай німае «Bibliothéque Polonaise у Парыжы, каторая багата усімі друкамі польскіх і беларускіх эмігрантаў. Прыняць трэба, што брашура надрукавана была у Вільні у друкарні Адама Кіркора дзеля таго, што шрыфт такі самы, як на кніжках і газэтах гэтай друкарні. Аутар верша: «Гутарка старого дзеда» — Вінцук Коротынскі, каторы, мусі быць, і друкавау кніжку тайна, памесьціушы у канцы яе верш Сырокомлі. Сын Вінцука Коротынскаго, пан Уладыслау Коротынскі, у Варшаві мае арыгінал верша, пісаны уласнаю рукою Сырокомлі.