|
ЯКІМІ СЛОВАМІ…
Якімі словамі сказаць мне любай,
Якімі песьнямі праліцца мне,
Што я ня веру больш асеньняй згубе —
Красе пахованай на дне.
Якімі словамі сказаць мне любай?
Пяройдуць дні, краса завяне,
Пяском сырым засыплюцца лісты,
І зноўку холад панясуць туманы
Агнём апошнім адцьвісьці.
Пяройдуць дні, краса завяне.
Таму ніколі я так сэрца не карыў,
І пацалункамі яшчэ душы ня пляміў,
А клёны плачуць золатам зары,
Гавораць лісьцямі, гавораць над палямі.
Таму ніколі я так сэрца не карыў.
Спакойна хіляцца каліны ўвечары,
Люляюць кволымі рукамі цені.
Каго я ведаў тут, ўжо больш ня стрэчу:
Яны з туманам дзесь адшалясьцелі.
Спакойна хіляцца каліны ўвечары.
Цяпер я зноў адзін, ні суму, ні тугі,
Схіляюць вербы русыя галовы,
І скрозь туман здаецца ўсё другім,
У вопратках асеньня-новых.
Цяпер я зноў адзін, ні суму, ні тугі.
Стаю каля вакна, а там вялізны месяц,
І ледзь бялее за гарой сяло,
І мімаволі горнецца да сэрца песьня,
Каб вечна радаваць кустамі слоў.
Стаю каля вакна, а там вялізны месяц.
Якімі-ж словамі сказаць мне любай,
Якімі песьнямі праліцца мне,
Што я ня веру больш асеньняй згубе —
Красе пахованай на дне?
Якімі словамі сказаць мне любай?
|
Прапануем да спампаваньня!