|
У сэрцы радасьць гімн вызвоньвае на струнах,
І вочы брызгаюць рашучасьцю стальной.
Глядзіш: сягоньня нівы —
Акіянам
Руні,
А ўчора — раны біў снарадамі тут бой.
Чуваць: стальнымі лёгкімі ўжо дыша горад.
Гудкі сьпяваюць песьню вольнага жыцьця,
А ўслухайся у нашых дзён шурпаты говар,
Што горда ў бор вякоў
Нясуць чырвоны
Сьцяг!
З іх кожны — волат, за плячамі з ношкай грузнай,
Шагае цьвёрда ў даль кудлаты галавач.
Ідзе шырокім шляхам,
Не па сьцежцы
Вузкай,
Вядзе мільёны край Савецкі будаваць.
Вядзе ад плуга, вунь — з мазольнымі рукамі,
Вядзе адтуль, дзе марсэльезаю гудок.
І кожны з іх нясе
Хоць невялічкі
Камень,
І кожны йдзе, каб будаваць Комуны дом.
О, сонца — лі свае гарачыя прамені!..
Зямля, адзень хутчэй вясновыя страі!
Цягучыя мы песьні звонкімі заменім
І з іх спляцём вянок
На голаў
Саўкраін!..
|
Прапануем да спампаваньня!