Дзіва (1927)/III/Раніцою

← Ліпнёвы кругабег

Раніцою Верш Аўтар: Нічыпар Чарнушэвіч 1927 год

Загукала →

Прапануем да спампаваньня!

РАНІЦОЮ

Загаманілі ў сенцах засовы,
Абнімаецца сьлепецень з совамі,
Змрок уцякае пад стрэху…
Апону чорнае ночы
Ў матузочкі дымнага клочча
Распарола дню
„Ку-ка-рэ-ку“.

∗
∗     ∗

Ліжуць грудзі палеткаў сонных
Таночкі абуджаных гудаў;
Доўгарукае праменьне сонца
Зор чародкі ў небе вудзіць.
Галованькі змораных кветак
Пацалунку палкага просяць;
Кудлатага лесу вецьце
На траву счухвае росы.
Завіхрылісь жніўнай заядзьдзю
Проці сонца пылінак ніці…
Па сьцяне дурэе зайчык,
Пракусіў ён вакяніцу.

∗
∗     ∗

А далёкі машынавы гоман
По затопленых ў зыркасьці гонях
Распаўзаецца клічнаю рэхай,
Бо апону чорнай ночы
У матузочкі дымнага клочча
Распарола дню
„Ку-ка-рэ-ку“.

1923 г.