Заранкі (1924)/Будаўніком новага жыцьця

Будаўніком новага жыцьця
Верш
Аўтар: Янка Журба
1924 год

Прапануем да спампаваньня!

БУДАЎНІКОМ НОВАГА ЖЫЦЬЦЯ.

З кожнай хвіляй ўсё магутней
Ваш чырвонай працы дзень,
Гэты ясны, агнякветны
Ваш прамень.

Хоць ваш вораг яшчэ моцны,
Працы хоць вялік абшар, —
Пераможа ўсе прашкоды
Комунар.

Дык-жа будзьце вы стыхійна
Маладымі, як вясна;
Згінуць ворагі, як тая
Мара сна.

Шчасьце ўнукам вы купілі,
Наш вы зьнішчылі праклён.
Не забудзем мы ніколі
Гэтых дзён.

Творчай працай ў жыцьці краю
Вы зрабілі значны сьлед;
Дачакаліся мы ўбачыць
Новы сьвет.

У сваёй вялікай працы
Будзьце ўпарты вы, байцы:
Сьветлай будучыны й шчасьця
Вы — тварцы.

Помніце, што, ўсё былое
Бурай зьнішчана даўно;
Зьнікла ў памяці народнай
Ўжо яно.

Над палямі чырванеюць,
Сьцягі вольныя мігцяць:
Крокам цьвёрдым выступае
Наша раць.

Золак сьветлы і яскравы
Спатыкае сёньня край…
Вольны люд, гэрояў працы
Апявай!