Заранкі (1924)/Дзеткам/Бабулька і козьлік

← У вёсцы

Бабулька і козьлік Верш Аўтар: Янка Журба 1924 год

Ластаўкі →

Іншыя публікацыі гэтага твора: Бабулька і козьлік.

Прапануем да спампаваньня!

БАБУЛЬКА І КОЗЬЛІК.

(З народнае казкі).

Шэранькі козьлік
Жыў у бабулькі,
Быццам у роднай
Мілай матулькі.
Козьліка бабка
Дужа любіла,
Ў хатаньцы цёплай
Вельмі пясьціла.
Красачкі, траўку,
Лісьцікі рвала,
Козьліку часта
Ежу давала.
Ў сенцах на траўцы
Клаўся ён спаці;
Часта ў садочак
Бегаў гуляці.
Раз захацеў ён
Бегчы ў гаёчак:
Стаў яму цесен
Бабкін садочак.
Козьлік разбурыў
Тын у садочку,
І апынуўся
Ён у лясочку.
Ў лесе, ў гушчары,
Сосны стаялі, —
Яго ваўкі там
Хутка дагналі.
Плакала ў хатцы
Доўга бабулька,
Як па дзяцёнку
Плача матулька.