Збор твораў (Гартны, 1929—1932)/1/Вакола і ўдаль/Ручаёк

← Восеньню

Ручаёк Верш Аўтар: Цішка Гартны 1930 год

Межкі →

Іншыя публікацыі гэтага твора: Ручаёк (Гартны).

Прапануем да спампаваньня!

РУЧАЁК

Там, за вёскай, ляжыць
Нівак вузкіх радок,
Між іх хутка бяжыць
З выш гары ручаёк.

На ваду з берагоў
Кусты лозак глядзяць,
Ў апранасе з лістоў
Ліпы-сёстры стаяць.

Па каменьнях вада
Рэзва плешча й бурліць,
Та сюда, та туда
Рвецца бег закруціць.

На паверсе яе
Цені лісьцяў ляжаць,
Вецер ў руслу снуе,
Бы што хоча сказаць.

Ня сьціхаюць над ім
Пташкі рэзвыя пець…
Ручаёк-жа сваім
Шляхам вечным цячэць.

Бесканечны чарод
Прамінае ўкол зьяў,
Ён-жа воду ўпярод
Гоніць пудка, як гнаў.

І пяройдзе яшчэ
Многа-многа пары,
Пакуль ён весь сьцячэ
З вышы стромай гары.

Пецярбург, 18/II 1914