Збор твораў (Колас, 1928—1929)/I/1/II/Гай

← Дарога

Гай Верш Аўтар: Якуб Колас 1928 год

Восень у гаю →

Іншыя публікацыі гэтага твора: Гай (Колас).

Прапануем да спампаваньня!

ГАЙ

Люба ўспомніць гай зялёны,
Сосан пышныя кароны,
Гурт прыўдалых іх камлёў,

Дзе так ціха, так прывольна,
Дзе і сам жывеш супольна
З жыцьцем хвояў і дубоў,

Што стаяць тут з даўніх часаў
І на хвоі зораць ласа,
бы на красачак-дзяўчат.

Я хадзіў адзін, маўклівы,
Ды вясёлы, ды шчасьлівы,
Думкі думаліся ў лад.

Эх, ты, гай! Ня раз, бывала,
Тут душа адпачывала,
Сэрца цешылася… чым?

Толькі-ж хто пра гэта знае?
Ты да я, да маладая…
Хто? — пра тое памаўчым!

1916 г.