Збор твораў (Купала, 1925—1932)/II/Па межах родных/Явар і каліна

← Сельскія могілкі

Явар і каліна Верш Аўтар: Янка Купала 1926 год

Явар →

Іншыя публікацыі гэтага твора: Явар і каліна.

Прапануем да спампаваньня!

ЯВАР І КАЛІНА

Песьняй вясны лебядзінаю,
Скінуўшы зімнія чары,
Шэпчуцца явар з калінаю
Ў сумнай даліне над ярам.

Лісьцікі зеленяй хваляцца
Небу панятлівай мовай:
Росамі мыюцца раніцай,
Песьцяцца сонцам паўднёвым.

Захадам модлы пакорныя
З маткай зямлёй адпраўляюць;
Тайна у ночаньку чорную
Месяца, зор выглядаюць.

Слухаюць сьмехаў русалчыных,
Лопату крыльляў начніцы,
Ветру павеваў ап‘янчаных,
Плюскату шклістай крыніцы.

Чуецца музыка дзіўная
Ў повесьцях сонных імшараў…
Цешыцца явар з калінаю,
Скінуўшы зімнія чары.

---