Збор твораў (Купала, 1925—1932)/V/II/Ўсюды лета…

← Летам

Ўсюды лета… Верш Аўтар: Янка Купала 1928 год

Дунулі сіверы… →

Іншыя публікацыі гэтага твора: Ўсюды лета…

Прапануем да спампаваньня!

ЎСЮДЫ ЛЕТА…

Ўсюды лета, лета,
Гулі строіць сонца,
Шалясьціць зялёны
Колас на саломцы.

Выйдзі, закрасуйся,
Як зара да ўсходу,
Пакажыся сьвету,
Сьвету ды народу!

І з праменьняў яркіх,
Яркіх зіхацістых,
Ты сатчы апратку,
Як-бы з кос агністых.

З васілёчкаў сініх,
З муравы зялёнай
Ты спляці вяночак,
Ты спляці карону.

У серабрысты росы,
Бы ў брыльлянты тыя,
Ты ўцьвяці убор свой,
Шаты залатыя.

Заясьней, зардзіся
Ў славе неразьвеўна,
Нібы дзіва тое —
Ў казцы каралеўна.

Пакажыся сьвету,
Сьвету ды народу,
Родная старонка,
Як зара да ўсходу!

19-VI—13 г.

---