Збор твораў (Купала, 1925—1932)/V/VI/Праступнік

← Поэзія

Праступнік Верш Аўтар: Янка Купала 1928 год

Песьня →

Іншыя публікацыі гэтага твора: Праступнік.

Прапануем да спампаваньня!

ПРАСТУПНІК

Судзеце мяне ў ссылку,
Закуйце ў ланцугі, —
Праступнік я вялікі,
Папоўніў я грахі.

На хату сухастойку
У панскай пушчы сьсек,
На дзірванок на дворны
Я езьдзіў на начлег.

У воласьць не аддаў я
Падаткаў у пару,
Схадзіць раз на абедню
Я не пасьпеў ў царкву.

Раз перад земскім шапкі,
Здурэў, забыўся зьняць,
Вурадніку, падпіўшы,
Хацеў касьцей намяць.

Чытаць люблю я кніжкі,
Газэтку раз знайшлі,
Крычаў з другімі з гора:
Свабоды і зямлі.

Я грэшнік, я праступнік,
Мой божа дарагі!
Судзеце мяне ў ссылку,
Закуйце ў ланцугі!

1907 г.

---