Збор твораў (Купала, 1925—1932)/VI/I/З надзеяй гаротнай…

← З бяды і нуды

З надзеяй гаротнай… Верш Аўтар: Янка Купала 1932 год

⁂ (Цяжка мне…) →

Іншыя публікацыі гэтага твора: З надзеяй гаротнай…

Прапануем да спампаваньня!

З НАДЗЕЯЙ ГАРОТНАЙ…

З надзеяй гаротнай,
З сьлязою чырвонай
Блуджу я, маркотны,
Па родных загонах.

Блуджу і ня знаю,
Дзе праўда, дзе сіла,
І ціха пытаю
У думкі нямілай:

Няхай мне гавора,
Няхай апявае
Аб сонцы, аб зорах
, Аб радасным краі.

Дзе неба — як неба,
Дзе доля — як доля,
Дзе хлеба — шмат хлеба
Дзе воля — раздольле!

Дзе людзі — як людзі:
Ня чахнуць у плесьні,
Дзе з сэрцамі грудзі,
Дзе песьні — як песьні!

Дзе сьпёкі, марозы
Ў знакі не даюцца,
Дзе ўздохі, дзе сьлёзы
Ня чутны, ня льлюцца —

Як самае сонца,
Дзе ясна — так ясна,
Як самае сонца,
Дзе шчасна — так шчасна.

Зазнаць хоць мінутку
Пацех гэткіх мілых!..
Бо ў вечным жыць смутку
Я, людзі, ня ў сілах!..

1908 г.

---