Маладняк — Янку Купалу (1925)/II/Як у лесе зацьвіталі

Як у лесе зацьвіталі
Верш
Аўтар: Янка Купала
1925 год

Іншыя публікацыі гэтага твора: Як у лесе зацьвіталі…

Прапануем да спампаваньня!

ЯК У ЛЕСЕ ЗАЦЬВІТАЛІ!..

Як у лесе зацьвіталі
Ліпа ды каліна, —
Залатыя сны снавалі
Мы з табой, дзяўчына,

Калыхаліся, шумелі
Вольныя бярозы,
Шапацелі, шалясьцелі
Трысьнякі ды лозы.

Як у жыце наліліся
Каласкі нагінна, —
Сустрэліся, абняліся
Мы з табой, дзяўчына.

Мігацелі, зіхацелі
У пракосах косы,
Заміралі кветкі, зельле,
Заміралі росы.

Як дасьпела, шчырванела
Ягада—рабіна,
Увакруг глянулі нясьмела
Мы з табой, дзяўчына.

Верасы пад лісьцем спалі,
Бор зялёны гнуўся,
Недзе пелі ў цёмнай далі
Журавы ды гусі…