Матчын дар (1929)/На чужыне/48

← 47. Слабасьці

48. Жыцьцё Верш Аўтар: Алесь Гарун 1929 год

49. Муляру →

Іншыя публікацыі гэтага твора: Жыцьцё (Гарун).

Прапануем да спампаваньня!

48.

ЖЫЦЬЦЁ.

Жывець спакойна вол пад тым ярмом сваім,
Намуляў карк. Мазолі, скрозь мазолі!
Падкінуць сена жмут — яму й таго даволі,
І лёс мізэрны свой не назаве благім.

Цярпліва зносіць ён нявыгады жыцьця:
Няхай яго часамі злаюць ліха,
Хай сьвішча страшны біч, — пакорліва і ціха
Ідзе разораю. Кіруе ім дзіця.

Жыві-ж, спакойна, вол, хадзі ў сваім ярме,
Цягай плугі і лій свой пот на пана,
Хаця ня ведаеш, якая рэч пашана.
Нашто яна табе? Сьляпому добра ў цьме,
Лягчэй ісьці яму дарогаю жабрачай…

А ты — жывёлаў цар? Ці-ж ты жывеш іначай?!..