Мая ліра (1924)/II/Чары Айчыны

Чары Айчыны
Верш
Аўтар: Казімір Сваяк
1924 год

Іншыя публікацыі гэтага твора: Чары Айчыны.

Прапануем да спампаваньня!

ЧАРЫ АЙЧЫНЫ.

З душой хворай, целам зьбітым,
Сыт нядолі — зьдзеку,
Морам горычы залітым,
Быў ў маладым веку.

Грудзі ўпалі, стан схіліўся,
Вусны, як з паперы:
Пакідаць ўжо сьвет маніўся
У мане бязверы…

А цяпер я ўжо здаровы,
Жыву, прыпяваю;
Шчэбят птушак, шум дубровы,
Гэты цуд спраўляе.

Гэй ты, родная старонка,
Гэй, краёчак мілы,
Хваліць буду цябе звонка
Да самай магілы!

Ты цярпеньне душы гоіш
І знямогу цела,
Жыцьцё творыш, песьні роіш,
Вучыш жыць умела.

Я зьнямог здаўна скаваны
Злой бядой і зьдзекам, —
Цяпер гартны, змацаваны
Красы тваей лекам…

Каліж хто цябе ня любіць,
Край мой родны, мілы,
Хай душу сваю загубіць,
Растраціўшы сілы.