Описанье и оборона събору руского Берестейского/Оборона/4

ОБОРОНА СЪБОРУ БЕРЕСТЕЙСКОГО
Аўтар: Пётр Скарга
1597

Прапануем да спампаваньня!

Яко рядъ и преложеньство одного пастыра съ Петромъ светымъ не умерло, але на Рымскихъ бискупахъ и папежахъ стануло.

Роздѣлъ 4.

Тое преложеньство Петра светого смертью его устать не могло. Бо костелъ Божый и овцы Христовы трваютъ аж до конца света и мусять меть такое опатрене и рядъ для збавенья своего. Кождая зверхность не для того есть, што на ней седить, але для тыхъ, которыми рядить. Еслижь за часу Петра светого костелъ такого старшого, якого Христосъ поставилъ, потребовалъ, — далеко болшъ по смерти Петра светого, кгды се на весь светъ розшираль. И для того оныхъ словъ, которые Панъ до Петра мовиль: «паси овцы Мои», не можетъ быть инакшое розуменье, одно ижъ тотъ урадь пастырства и на потомки Петровы стегатьсе маеть. Што Златоустый светый далъ знать, кгды мовить (въ книгахъ вторихъ о иерействе): «за овцы Свои Христосъ кровь Свою розлилъ, которые стараню Петровому и наступникомъ его поручаль».

Тоть потомокъ и наступникъ Петра светого не есть инъший, одно бискупъ Рымский, и тое местце, на которомъ Петръ светый умучонъ и умерлъ, привилея свои того местца бискупомъ зоставуючи. И такъ Кгрецкие докторове розумели, и вси соборы альбо конъцылия бискуповъ всего свѣта.

1. Напередъ пишеть Иренеушъ (въ книгахъ третихъ, глава третяя): «до костела, дей, отъ Петра и Павла въ Риме оундованого, для моцнейшого его преложеньства, мусять се вси иные костелы зходить, то есть вси верные. Бо въ немъ завжды есть духовное поданье албо наука тая, которая есть отъ апостоловъ». Видишъ, яко (се) преложеньство тому Римскому костелу приписуеть и верные дохованые науки апостолское. И хто около нее блудить не хочеть, тамъ се утекать и о ней пытать кажеть. Тотъ докторъ жылъ около року 150.

2. Епифаней о бискупахъ Всходнихъ сторонъ такъ пишеть (ереси шестьдеосмый): «Урсацыусъ и Валенсъ, жалуючи за грехъ свой, съ писмомъ своимъ поехали до светого бискупа Римъского Юлиуша, абы се ему справили зъ блудовъ и греховъ своихъ». По штожь бы ездили такъ зъ далека зъ Восточныхъ сторонъ на справу и очисченье свое, кгды бы звирхности Римского бискупа не знали?

3. Оѳанасей Великий, докторъ Кгрецкий, до папы Ѳеликса въ листе мовить: «для того васъ и продки ваши, то есть апостолские епископы Панъ Богъ на высокости замку поставилъ, и старанье вамъ о всихъ костелахъ росказалъ, абы есте намъ помагали, кгды им геретыки Арияни были тяжки.

4. Василей Великий, докторъ Кгрецкий, въ листе до Атанасыуша пишеть (епист. 52); «здалосе намъ слушно, абысмы писали до папы Римского, абы онъ речомъ нашимъ присмотрельсе, а выроку своего розсудокъ выдаль. А ижъ съ трудностью оттуль за зданьемъ соборнымь посланый быть хто можеть, онъ нехай дасть тую моцъ выбранымъ некоторымъ мужомъ, которие бы працы подрожные вытръвали, а ласкавостью и приемностью обычаевъ, и мудрою а снадъною мовою упомнеть ихъ могли, которые зъ доброе дороги зъступили, и которие бы деи собору Ариминского принесли, абы ихъ зопсовано, и то, што се черезъ моцъ деяло». Туть вызнаваеть, ижъ бискупъ Рымский и черезъ послы свои, яко навысший пастыръ, Въсходные костелы ревидовать и (посвесчать) направовать моглъ. А што большъ, ижъ онъ самъ злые и ѳалшивые соборы геретыцкие псовать моглъ.

5. Григорей Назыяизенский въ вѣръшахъ о жывоте своимъ пишеть: «Рымъский костель завжды заховалъ о Пану Богу правъдивую науку, яко такому месту пристало, которое на весь свѣтъ звирьхность маетъ». Не мовитъ о свецькомъ панъстве и звирхъности Рымской: бо вжо была до Царокгроду перенесена; але о духовной Петра светого звирхъности, ижъ пры бискупахъ Рымскихъ зостала.

6. Кириль, Александрийский патрияръха (въ Скаръбе), яко кладеть слова его Генънадей (о старшеньстве яко въ главе 12), такъ пишет: «мусимъ, яко члонькове, за головою, то есть за Рымскимь папою и столицою апостольскою, отъ которое пытатися мамы, яко верить и тримать. Бо его то самого урядъ есть: откидать и радить, карать и потверъжать, становить, звезать и розвезать».

7. Златоустый светый до папы Инъноценцыя пишеть (въ листе 1): «прошу тебе, абы еси писалъ, жебы такъ несправедливые поступки моцы не мели; а тые, которые зле учынили, костельнымъ правомъ были карани». Утеклься былъ до него, на Теоѳилюса патрияръху Александрийского жалуючысе, кгды его зъ столицы его непристойне складалъ и выклиналъ, до Римъского бискупа, яко до судьи епископовъ всихъ.

8. Ѳеодоритъ пишеть въ листе до Леона папы: «я жду выроку апостолское вашее столицы, и прошу вашои светобливости, абы ми помощъ дала тому, который до вашого справедливого розсудку апелевалъ». И до Ренатея каплана тотъ же пишеть: «столица Римская держить раженье костеловъ всего света, и для иныхъ причинъ и для того, ижъ была завсегды отъ смродовъ геретыцкихъ прожна, а нихто на ней не седелъ, который бы зле о вере светой держалъ».

9. Геннадей Схолярый, патрыярха Царогородцкий (въ книгахъ о старшенстве, въ главе 7), пишеть: «папа Римский есть головою всего костела и мистромъ; ему толко дано есть о вере судъ и выбаданье чинить, и радить всимъ светомъ, геретыки зъ ихъ местъ выганять, а правоверные приворочать». Тотъ патрыярха Царогородский своимъ Кгрекомъ. Тогъ же нижей мовить также: «Всходные епископы не мели се до кого иного утекать в кривдахъ своихъ, одно до папы Римского, припоминаючы ему слово тое Господне до Петра светого речовое: потвержай братью свою». И припоминаеть Златоустого светого, который до Инноценцыя (папы) въ своихъ кривдахъ апелевалъ, и иньшие.

Тотъ же такъ мовить въ розделе 16: «nana Римский есть наступникъ светого Петра и наместникъ Збавителя нашого Исуса Христа, и онъ самъ маеть моцъ навысшую редить церковъ (Божью), звязовать и розвязовать, карать и благословить, и выклинать, направовать и лечить, и онъ самъ маеть моцъ о вере и о капланстве выпытыватьсе». И приводить старого и великого и светого у Кгрековъ Ѳеодора Студейского, который такъ до папы Пасхалея пишеть и мовить; «слухай, голова апостолская, отъ Бога выбраная, пастыру овецъ Христовыхъ, ключнику королевства небесного, каменю веры, черезъ которую збудованъ есть католический костелъ. Бо ты естесь Петръ (и) Петрову столицу окрашаючий и радечий. Тутъ, прави, прийди до Царогороду противъ геретыкомъ образоборъцомъ отъ заходу слонъца, а не отмѣтай насъ до конца. Бо до тебе реклъ Христосъ Богъ нашъ: ты навороченый потверъжай братью свою». Жылъ тотъ Ѳеодоръ около року Божего осмисотъ двадцатого.

Тотъ же Ѳеодоръ Студейский до Михаила цесара образоборцы пишетъ: «з[ъ]ехавшисе, яко есте росказали, епископы и иные преложные, вашы есмо вонтпливости розвезали; але если есче въ чомъ вонтъпите албо не верите велможность ваша, - просите о выкладъ папы (Римского). Рука ваша отъ Бога умоцнена, посполитого пожитку прагнучая, нехай роскажетъ отъ Старого Риму взять обьясненье. Бо такъ намъ отъ початку отъ отцовъ нашихъ подано. Тая столица Старого Риму, о, наслядовца Христовъ цесару, межы иными всими костелы навызшое маеть местце, где Петръ першую держалъ столицу, до которого Господь реклъ: ты еси камень, а на томъ каменю збудую церковъ Мою, и врата пекелные не премогуть ее».

Слухаймо, што пишеть Юстиниянъ цесарь до Епиѳаниуша, Царогородского патриархи, тамъ же въ Царогороде, а тотъ листъ кладетъ Геннадей, Царогородский патриярха, въ розделе осмомъ o старшеньстве: «Во всем» (, мови,) заховуемъ постановене едности пресветыхъ церквей, которое се пренасветейшимъ папою и патрыярхою Старого Риму стало, до которого тожъ пишемъ, ижъ мы того не допустимъ, абы вси справы, до стану церъковъного служачые, до его благословенства, яко до головы всихъ, пресветыхъ презвитереи, прыношоны быть не мели. А ижъ по вси часы, кгды въ тыхъ сторонахъ геретыки повставали, вырокомъ и розъсудъкомъ оное чети годъное столицы отогнани сутъ, -а намъ се то годить мовить и такъ замкнуть: ижъ тые вси, которие его хотять меть и мають за голову, то есть папу (Рымского), сутъ светые а правдивые Божие презвитеры и слуги верные; а которые не хотятъ, ани его за голову свою мають, не суть Божые слуги». Обачъ же кождый повагу тыхъ словъ, што старые патрыярхове и цесари Царогородские о той светои столицы держали! И за тыми словы прыкладаеть то Генадеи помененый: «которые, дей, не идутъ за столицею Петра светого Рымъскою, отсчепеньцы суть и въ герезыю впадаютъ, и штоколвек, чинять — все есть зальшованое и непожиточное». То Кгрек до своихъ Кгрековъ пишеть.