Раніца рыкае (1925)/Песьня/Ой ды, песьні мае, цёмнавірыя!

← ⁂ (Не ўдалося ў гэта мне лета)

Ой ды, песьні мае, цёмнавірыя! Верш Аўтар: Язэп Пушча 1925 год

Эх, песьня! →

Іншыя публікацыі гэтага твора: Ой ды, песьні мае, цёмнавірыя!

Прапануем да спампаваньня!

ОЙ ДЫ, ПЕСЬНІ МАЕ, ЦЁМНАВІРЫЯ!

Ой ды, песьні мае, цёмнавірыя!
Ну, куды вы, палкім раньнем душы?
Ці-ж ня лепей сакаліным ды выраем
карагодзіць вясны сінякудры узвыш?

Ну, нашто вы усьпенілі музыку слоў
і паводкай шумуеце вобразаў сьмелых?
Ці ня хочаце толькі быць новым паслом
ад сялянскіх мурожных аселіц?

Ну, добра — я з вамі згаждуся, —
хай выбрыкуе рытм сівагрывы,
Эх, бывае, — маркотным хаджу я,
бо ня з тых-жа, душою што крывяць.

Але гэта нічога, — пабачым,
хто дню новаму ўскіне заслону?!
Хоць я вырас, як сын той сабачы,
ўсе-ж жыве у грудзёх сакалінае слова.

Я люблю яго болей, як моцна,
Мяне вабіць уцеха блакітам вачэй.
Гэй вы, размахі юнацкага сонца,
каласеце маіх думак ячмень!