Творы М. Багдановіча (1927—1928)/I/I/8

← 7. „Нашай Ніве“

8. Прыдзе вясна Верш Аўтар: Максім Багдановіч 1927 год

9. Хрэсьбіны лясуна →

Іншыя публікацыі гэтага твора: Прыйдзе вясна.

Прапануем да спампаваньня!

8.

ПРЫДЗЕ ВЯСНА.

Холадна. Вецер на полі гуляе,
Вые, як зьвер,
Сьнег узрывае, нуду наганяе, —
Кепска цяпер!
Але мне сэрца пяе: ня нудзіся!
Прыдзе вясна!
Гукне: «Прачніся, зямля! прабудзіся
З цяжкага сна!»
Сонца прагляне, зазелянее
Траўка ў лугу,
Гукне вясна і, як ветрам, разьвее
Гора-нуду!

1909.

Увагі

8. Прыдзе вясна. Верш друкуецца з „Нашае Нівы“ і задатаваны годам надрукаваньня — 1909. Напісаны быў не пазьней 1908 г. Гэта відаць з наступнага: у канцы вершу ў „Н. Н.“ ёсьць прыпіска: „Ніжні Ноўгарад“, а, як вядома, з Н.-Ноўгараду ў Яраслаўль поэта пераехаў улетку 1908 г. (Матэрыялы да біографіі М. Б. бацькі поэты).

У 9-ым р. „сна“ зам. „сну“ застаўлена для захаваньня рыфмы.

Прыводзім пераклад гэтага вершу на украінскую мову, выдрукаваны ў „Літературна-Навуковім Вістніку“ 1909 г. № 9.

Прийде весна!
Холодно. Вітер по полю гуляе,
Виє, мов звір;
Сніг підріває; нудьгу наганяе,
Кепсько сих пір!
Серце ж співає: гей, не нудися!
Прийде весна!
Крикне: прокинься земля! Разбудися
З тяжкого сна.
Сонце прогляне; зазеленіє
Травка в гаю.
Крикне весна і, як вітром, розвіє
Скруту мою.