Хай бяз ботаў, бяз шынэлі,
у мяцелі, сьцюжы,
дружна біліся, гарэлі,
агнявелі — здужыць!
Як штыхі ад сонца, стальлю
вочы зырка зьзялі.
Што Кастрычнік горда даў нам,
адстаялі слаўна!
∗
На разваліны-руіны,
ўзвод за ўзводам,
выйшла армія краіны
баявым паходам!
Загаілі фабрык раны
працай дружнаю, стараннай.
Загулі былі машыны
гэтак радасна, нястрымна.
∗
Замест патронаў — зерне!
Замест бронявіка —
трактар пераверне
хутар кулака!
За прасторы, за абшары
і на межы-дрот —
Армія Чырвоная —
— Аграпаход!
∗
Бяз працы ў голадзе гінуць
мільёны рабочых краіны.
На біржах працы
зьлёт.
Выходзіць змагацца
галодны паход!
На барыкады,
засесьці ў акопы
клічуць рабочых
Эўропы!
∗
Труціць, як калісьці,
імкнуцца народ.
Зьбіраюцца выйсьці
ў „крыжовы паход“.
Разам з прадажным
штандарам хрыстовым
крыжам зьляжа —
„паход крыжовы“!
∗
Мы закон жыцьця зьмянілі!
Ня стрымаць нас! Не асіліць!
Рух — на Захад! Мусім там быць!
Узарвем заставы-дамбы!
Хто ня верыў, што ўзараем
поле безгранічна?
Што пачуецца над краем
гул машын фабрычных?
Хто ня верыў, што краіну
З векавых балот і ціны
прывядуць байцы-паўстанцы
ў край электростанцый?
Чырвонасьцяжныя паходы
год за годам — лявай —
новых дзён цьвітуць усходы
бальшавіцкай славай!
Прапануем да спампаваньня!