Урачыстасьць (1925)/Урачыстасьць жыцьця/Сымфонія

Сымфонія
Верш
Аўтар: Цішка Гартны
1925 год

Іншыя публікацыі гэтага твора: Сымфонія (Гартны).

Прапануем да спампаваньня!

СЫМФОНІЯ

Мята, рожа, півонь,
Вішань сьпелых чырвонь —
Пах, мілаваньне…
Ветру повей ў лісткох,
Дрэўцаў ціхенькі ўздох —
Рух, калыханьне…
Пчолка, стрэлка мігнуць,
Нітку лёту саўюць —
Струн трапятаньне…
Кропку-роску ў сату
Ўгледзяць і на ляту —
Спуск, ападаньне…
Золата-луч пральле
Сонца на ліст, гальле —
Спор, пукаваньне…
Мошка, мушка, жучок
Сонца рвуць касьнічок —
Рай, лікаваньне…
Зложаны, зьліты сьпеў
Іх між кветак, між дрэў —
Жыцьце, іграньне…
Радасьць, ўздым, благадаць,
Прага ў паху растаць —
Вечнасьць яднаньня…

Капыль, 20/VI-23 г.