Biełaruski chryścijanski ruch (1939)/Dapisy
| ← XI. Apošnija padziei BChD | Dapisy Аўтар: Адам Станкевіч 1939 год |
Krynicy i litaratura → |
Прапануем да спампаваньня!
Da raździełu III: Dziejnaść ks. Fr. Hrynkieviča i Horadzienskaha hurtka biełaruskaj moladzi jarka aśviatlajuć, niavykarystanyja ŭ hetaj pracy, nastupnyja dakumanty:
1. Prahrama biełaruskaj viečarynki 19.11.1910 h., złožanaja z troch čaściej: a) ustupnoje słova, referat — "Biełarusy i ich nacyjanalnaje adradžeńnie", biełaruskija pieśni; b) pjesa "Pa revizii" i c) deklamacyja biełaruskich vieršaŭ. Prahrama nadrukavana łacinkaj.
2. Prahrama biełaruskaj viečarynki 16.11.1911 h. Matarjał razłožany tak, jak i ŭ papiaredniaj prahramie: a) referat — "Adhałosak dušy biełaruskaha narodu ŭ jaho pieśniach, kazkach i padańniach" i pieśni; b) pjesa "Modny šlachciuk" i c) deklamacyja bieł. vieršaŭ. Prahrama nadrukavana i łacinkaj i hraždankaj.
3. Na vaśmioch bačynach čaćviorki arkuša kancelaryjnaha farmatu źmieščany ŭ biełaruskaj movie "Časiny da Pračystaj Dziavicy". Jość heta pierakład pačatku polskich godzinek", zrobleny ks. Fr. Hrynkievičam.
4. Rukapisny prajekt pramovy, ci referatu ŭ 500-yja ŭhodki zvajavańnia Niemcaŭ pad Hrunvaldam. Prajekt hety zajmaje try bačyny arkuša kancelaryjnaha farmatu. Pisany rukoj ks. Fr. Hr. Jak vidać sa źmiestu, referat hety mieŭ pračytać niechta z biełaruskaj moładzi na supolnym śviatkavańni henaha jubileju razam z moładziaj polskaj. źmiest patryjatyčny. Havorycca tam, miž inšym, ab ciažkim pałažeńni biełaruskaha narodu, ab admaŭlańni — „z dvuch bakoŭ“ — Biełarusam „prava na žyćcio“ i ab tym urešcie, što „ŭ našych rukach naša pryšłaść“. Na rukapisie krasujecca zrobleny sinim ałavikom vialikimi litarami hetki napis: „Prahrama pramovy na Hrunvalck. viečar“ — ni zbyŭsia jon, bo“ ... Rukapis napisany łacinkaj, davoli dobraj biełaruskaj movaj.
5. Rukapisny biełaruski lemantar, napisany łacinkaj, na 11-ch bačynach zvyčajnaha sšytka. Aŭtar i hod napisańnia nie pakazany. Apracavała hety lemantar, jak ćvierdzić dr. St. Hrynkievič, Antanina Sadoŭskaja, jakaja pryjmała dziejnaje ŭčaście ŭ Horadzienskim hurtku biełaruskaj moładzi.
6. Zharmanizavanaja na čatyry hałasy biełaruskaja prypieŭka „Išoŭ Tador i z Tadoraj, našli łapać i z aboraj“.
7. Vizytočka: „Ks. Fr. Hrynkiewič“.
Da raździełu IV: Braŭ učaście ŭ biełaruskaj chryścijanskaj narodnaj pracy viedamy biełaruski zasłužany adradženiec, vydatny dziajač i piśmieńnik, zhinuŭšy ŭ Savietach, Vacłaŭ Łastoŭski: 1) Pamahaŭ vydavać „Biełarusa“, 2) vydaŭ biełaruskuju katalickuju „kantyčku“ i „Першыя малітвы“ dla pravasłaŭnych, 3) zarhanizavaŭ „Zołak“, prytułak dla biełaruskich dziaciej, kiravany ŭ chryścijanskim duchu, 4) z jaho inicyjatyvy byŭ stvorany biełaruski relihijny ściah, jaki doŭhija hady prabyvaŭ u kaściele śv. Jana ŭ Vilni, 5) pryčyniŭsia da aficyjalnaha ŭčaścia Biełarusaŭ u pracesii Božaha Cieła na vulicach Vilni padčas niamieckaj akupacyi, 6) apracavaŭ biełaruskuju „Katechizmoŭku“, jakaja ŭ rukapisie zachavałasia až da siańnia.