Hołas dušy (1926)/III/Kapłanstwa i Žanimstwa

Kapłanstwa i Žanimstwa
Публіцыстыка
Аўтар: Казімір Сваяк
1926 год

Прапануем да спампаваньня!

Kapłanstwa i Żanimstwa.

Kapłanstwa, heta — Sakrament, praz katory ŭdzialajecca asobnaja Božaja łaska spaŭniaci pawinnaść ksiandzoŭ. Sakrament hety dajeć prawa adpraŭlać światuju Imšu, udzialać Sakramenty i spaŭniać inšyja čynnaści św. Kaścioła. Nadajeć heta świataja Tajnica jšče asobny charaktar dušy, katory trywać budzie wiečna. Sw. Pawał nazywaje kapłanaŭ: „słuhami Božymi i razdaŭcami tajnic Božych“.

„O, dziŭnaja hodnaść kapłanaŭ — piša światy Aŭhustyn, — Syn Boży znachodzicca na rukach wašych, jak na ŭłońni Pračystaj Dziewy“! Ksiandzu daručyŭ Boh kluč ad skarbaŭ, što wysłužyŭ Chrystus swaim mučeńniem i śmierciaj. Jon ich ścieraže, jon ich razdzialaje. Heta čalawiek, katory zastupaje na ziamli Boha, bo maje Božaje daručeńnie. „Idziecie — kaža Chrystus Apostałam — jak mianie Ajciec pasłaŭ, Ja was pasyłaju“. Kali-b adnačasna spatkaŭ ja kapłana i anieła, prywitaŭ-by piarwiej kapłana, bo anieł-pryjaciel Božy, a ksiondz, heta — Jaho zastupnik… Zwoniać u kaściele. Wy jdzicio na hety hołas. Kudy-ž heta? — „Karmić dušy našy — adkažacie. Čym-ža kormicie dušy wašy? — Chlebam Anielskim. — A chto-ž maje kluč, chto pryhataŭlaje chleb hety? — Słuha Božy: kapłan. — A što-ž heta za chleb dziŭny? — Cieła i Kroŭ Boha našaha Jezusa Chrystusa. Kapłan, jak taja maci, što kormić dzicia, kaža: Biarecie-ježcie, heta Cieła Pana našaha Jezusa Chrystusa; niachaj was ścieraže i dawiadzieć da žyćcia wiečnaha… Widziačy kaścioł, pytajuć dzietki: „Što tam?“ — Tam jość Ciela Boha našaha. — A skul-ža jano tam? — Bo ksiondz adpraŭlaje Imšu światuju… Kapłan — prawodnik dušy. Pakińcie parafiju biez ksiandza na niekulki dziesiatkaŭ hadoŭ, buduć tam žyć jak żwiaraty, a mo’ i čeść addaduć źwiaratam. Jak worahi chočuć znistožyć relihiju, začynajuć ad ksiandzoŭstwa, bo tam, dzie niama słuh aŭtara, niama i afiary; a dzie niama afiary światoj, tam niama i relihii. Ksiandzoustwa, heta — ćwiet miłaści Serca Božaha. Hledziačy na kapłana, dumajcie ab Chryście Jezusie^[1].

Malitwa za Biskupaŭ i Kapłanaŭ.

O, Chryste Jezu! Z woli Twajej słuhi Twaje Biskupy i Kapłany wiaduć sprawu zbaŭleńnia rodu ludzkoha, apawiadajučy nawuku Twaju i pasilajučy światymi Sakramentami. Budź-ža Ty, o Jezu, Mocaj ich i Praŭdaj, kab wiali nas ściežkami sprawiadliwaści Twajej, pad kiraŭnictwam wikaraha Twajho: św. Ajca. Wiarni jednaść usim adłučanym błahoj rukoj ad Katalickaj Suspolnaści.

Pryjdzi waladarstwa Twajo, o Jezu!

∗
∗ ∗

Žanimstwa, heta — Sakrament, katory z woli Chrystusa dajeć łasku i pomač na spaŭnieńnie abawiazkaŭ muža i žonki. Złučaje jon nierazryŭnym wuzłom luboŭ žančyny i mužčyny až da mahilnaj doški. Dajeć im uładu nad ciełam dziela zachawańnia rodu ludzkoha. Nakładaje pawinnaści ŭzhadawańnia dziaciej. Zwialičaje łasku ŭświačeńnia i pomač dajeć na dobryja ŭčynki dziela zbaŭleńnia. Św. Pawał tak piša ab hetym: „Mužy, lubiecie žony wašyja, jak i Chrystus palubiŭ Kaścioł i Samoha siabie wydaŭ za jaho. — Sakrament heta wialiki: a ja kažu — wialiki ŭ Chrystusie i ŭ Kaściele“. Prystupajučy da hetaha Sakramentu, zwaž dobra na tyja pawinnaści, što biareš na siabie, — i prasi Boha, kab ich spoŭnić patrapiŭ. A z usich abawiazkaŭ najtrudniejšy — heta wyhadawać dziaciej pa-Božamu.

Malitwa maladych.

O, Zbaŭca Miły, Jezu Chryste! Ty na wiasielli ŭ Kanie Halilei swajej prysutnaściaj uświaciŭ zwiazak zamužny. Prybudźža i na našaje wiasielle i bahasławienstwam swaim abdaruj. Sercam našym daj luboŭ i jednaść: uspamahaci zaŭsiody siabie i ŭzrastać u miłaści i jednaści z Taboju, Boham našym. Daj, o Chryste, kab wierna my zaŭsiody lubilisia j pamahali sabie wypaŭniać prawa Twajo ŭ žyćci našym štodziennym. Daj łaskawa nam stacisia paciechaj prad Prazoram Twaim, spaŭniajučy ŭsio dziela chwały Twajej, Praz zasłuhi Twaje i Twajej Matuchny światoj. Amen.

Ojča naš… Prywitana budź… Chwała Ajcu…

↑ Z b. ks. Wjanneja.

[1] Z b. ks. Wjanneja.

[1]