Lekcyi i Evanelii na niadzieli i śviaty (1938)/I/16

16. Na II niadzielu Vialikaha Postu
Урыўкі зь Бібліі

1938 год
Пераклад: Адам Станкевіч

Прапануем да спампаваньня!

NA II NIADZIELU VIALIKAHA POSTU.

I.

Braty, prosim vas i molim u Panu Jezusie, kab taksama jak vy atrymali ad nas, jak majecie pastupać i padabacca Bohu, tak i pastupali, kab byli bolš daskanalnymi. Bo vy viedajecie, jakija prykazańni daŭ ja vam ad Pana Jezusa. Bo hetkaja vola Božaja, kab vy byli śviatyja, kab ustrymlivalisia ad raspusty, kab kožny z vas viedaŭ, jak dziaržać cieła svajo ŭ śviataści i pašanie; nie ŭ pažadlivaści cialesnaj, jak pahancy, katoryja Boha nia znajuć, i kab nichto nia kryŭdziŭ i nie ašukvaŭ u spravie brata svajho, bo mścivy Pan za ŭsio hetaje, jak my vam raniej havaryli i ćvierdzili. Bo nie paklikaŭ nas Boh da niačystaści, ale da śviataści ŭ Chrystusie Jezusie Panu našym.

(1 Tessal. 4, 1—7).

II.

U heny čas uziaŭ Jezus Piatra, Jakuba i Jana brata jahonaha i zavioŭ ich adnych na vysokuju haru i pieramianiŭsia pierad imi. I zajaśnieŭ jahony tvar, jak sonca, adzieńnie-ž jaho stałasia biełaje, jak śnieh. I voś źjavilisia im Majžeš i Ilja, katoryja havaryli z im. A Piotr adazvaŭšysia, pramoviŭ da Jezusa: Panie, dobra nam tut być: kali chočaš — zrobim try budany: tabie adzin, Majžešu adzin i Ilji adzin. Kali jon jašče havaryŭ, voś vobłak jasny akryŭ ich. I voś hłas adazvaŭsia z vobłaku: heta jość syn moj miły, u katorym mnie da ŭspadoby, jaho słuchajcie. A vučni, pačuŭšy hetaje, upali na tvar svoj i vielmi spałochalisia. I padyjšoŭ Jezus, dakranuŭsia da ich i skazaŭ im: ustańcie i nia bojciesia. Jany-ž, padniaŭšy svaje vočy, nikoha nia ŭbačyli, aproč tolki Jezusa. A jak zychodzili z hary, zahadaŭ im Jezus, kažučy: nikomu nie havarecie, što vidzieli, až pakul Syn čałaviečy nia ŭstanie z umioršych.

(Mat. 17, 1—9).