Rodnyje zierniaty (1916)/I/Maci
| ← Chleba budnaho daj nam siahońnia | Maci Верш Аўтар: Якуб Колас 1916 год |
Praŭdziwaja matka → |
| Іншыя публікацыі гэтага твора: Маці (Колас). |
Прапануем да спампаваньня!
Maci.
Nieprywietna cieraz wokny nočka paziraje. Cicha ŭ chacie — ŭsia siamiejka spić dy spačywaje, natrudziŭšy dobra ruki, natamiŭšy plečy. Tolki matka z wieraciencam prytuliłaś k piečy i pradzie, pradzie kudzielku. Skače wieracienco, a za jej hustyje cieni biehajuć pa ściency.
∗
∗ ∗ |
Na kaminku korč pyłaje, złotam iskry skačuć. Za wakoncam wiecier chodzić, hłucha wierby płačuć. Ziabnuć wierby na marozi, prytuliŭšyś k stresi; śnieham wiecier syple ŭ dźwiery, chodzić šum pa lesi… I pad hety šum trywožny dumaje staraja, a ŭ śled dumkam niespakojna wiecier padpiewaje.
∗
∗ ∗ |
Ŭsio pračnułoś prad wačyma biednaje kabiety: maładyje dni dziacinny, dziawočyje lety, radaść žyćcia i niahody, swarki, trasianiny — ŭsio, čym žyécio spatykaje — kiepskije časiny, ŭsio prypomniłoś stareńkaj. Horka biednaj stało: haławu na hrudź schiliła, praści pierestała.
∗
∗ ∗ |
Muž, niaboščyk, ŭspłyŭ na dumku: rana śmierć skasiła! Drobnych dzietak jon pakinuŭ, — biez pary mahiła. Žyŭ jon biedna. Spadziewaŭsia swoj prydbać kutočak: chatu wywiaści, ziamielki prykupić šmatočak. Bo ahorknuŭ chleb batracki, žyćcio padjaremna… Dy nia wyjšoŭ s-pad niawoli: biŭsia wiek daremna.
∗
∗ ∗ |
Haśnie korčyk na kaminku. Paciamnieło ŭ chacie. Poŭnač pieŭni prakryčeli, dy nia śpić ŭsio maci. Ciahnie nitku. Wieracienco z ruk upaŭšy hruknie, dy niaśmieła, jak ubohi, wiecier ŭ dźwiery stuknie. Dumki dumku padhaniajuć, nie dajuć spakoju: ŭsio letajuć nad kabietaj nudnaj čeradoju.
∗
∗ ∗ |
Uzdychnuła ciažka matka. Ab synku hadaje, što tam niedzie ŭ paniawiercy karu adbywaje. I za što? U tołk nia woźmie biednaja kabieta ni zakonoŭ henych mudrych, ni paradkoŭ świeta…
∗
∗ ∗ |
Wiecier wyje za wuhłami, ŭ kominie hałosić. Kudy tolki dumka taja matku nie zanosić? Ziabnuć wierby na marozi, hłucha les hamonić. Dumka dumku wyklikaje, dumka dumku honić.
∗
∗ ∗ |
Što znače słowo „niahody?“ (ad niahodna, drenna, niepryjemna). Što znače słowo «prydbać?» (ad słowa dbać, staracca, nabywać). Jaki heta chleb batracki? Što znače «žyćcio padjaremna?»