|
Z wiasnoj pryšło da nas ciapło,
Radzieje ŭsia ziamla:
Zaćwiŭ muroh, ukryŭšy łoh
Zialenicca ralla.
Pach świežy z dreŭ čuwać i śpieŭ,
Ptušyny ciešyć nas;
Mihcić matyl, kamar i hil
Zwiniać ŭ paŭdzionny čas.
U bieli sad pasłuchać rad
Swist-ščebiet sałaŭja,
Što cicha sieŭ u huščy dreŭ,
Miž inšaha ptušja.
Pčała z wulloŭ u prastor paloŭ
Puščaje nowy roj,
Rupny pčalnik k wullom prynik
Z siawieninaj staroj.
Čabor, ramon miažu, zahon
Ukwiecili wiankom,
A zbažyna žyćciom pjana
Bruniaje kałaskom.
Pach wasilkoŭ pčału, čmialkoŭ
Prywabiŭ brać miadok,
Z haračyni u huścini
Schawacca ŭ chaładok.
Ručej burlić, až kryštalić
U światle swaju wadu.
A rybak roj pływie u joj,
Pluskoča na chadu.
Wiasielle skroś. I ljecca štoś
Da serca u čas taki;
Majowy čas usiej dušoj
Ja pju, šukaju lhi.
I lohka mnie, kazaŭ-by ŭ śnie
Spakojnym, u majski znoj,
I widžu ja zakon žyćcia
U dumcy woś jakoj:
Jak chočaš žyć, wiasielle pić
Za pracu, hora, trud,
Lubi światło, znienawidź zło,
Ŭsialaki hrešny brud.
U žyściowy splot — dzieł dobrych, cnot
Ty kwietki uwiwaj,
Dyk i dušy ŭ światoj cišy
Zaświecić wiečny maj!
...............
I tut moj duch uzniaŭsia ŭdruh
Da poŭni charastwa,
Jakim jość Boh — woś rwiecca ŭzdoch
Z hrudziej da Božastwa.
| 
Прапануем да спампаваньня!