Бярозка (1912)/Чэлавек
| ← Бярозка | Чэлавек Апавяданьне Аўтар: Ядвігін Ш. 1912 год |
Хлеб → |
| Іншыя публікацыі гэтага твора: Чалавек (Ядвігін). |
Прапануем да спампаваньня!
ЧЭЛАВЕК.
І прыйшоў чэлавек да Бога свайго і кажэ:
— Божэ! забяры ад мяне Бяду, Сьлязу і Хваробу, а дай мне Волю, Шчасьце і Здароўе.
Бог і кажэ:
— Добра, чэлавечэ, будзе так, як ты жадаеш.
І стаў жыць чэлавек без Бяды, без Сьлязы, без Хваробы, а—вольны шчасьлівы і здаровы. Ажно прыйходзе сьмерць і кажэ:
— Чэлавечэ, паміраць пара.
Чэлавек, калі жыў з Бядой, Сьлязой і Хваробай, не раз сам жадаў і рад быў са Сьмерці, але цяпер жаль яму стала жыцьця.
І пайшоў чэлавек да Бога свайго і кажэ:
— Нашто Ты, кажэ, хочэш адбіраць у мяне тое, што сам дараваў? Забяры ад мяне Сьмерць.
Бог і кажэ:
— Добра, чэлавечэ, будзе так, як ты жадаеш.
Ішлі вякі, ляцеў час.
І прыйходзе чэлавек да Бога свайго і кажэ;
— Божэ, усё я зведаў, усяго зазнаў, адна толькі рэч незнаная мне асталася.
Бог і кажэ:
— Чаго-ж ты, чэлавечэ, хочэш?
— Сьмерці, атказывае чэлавек.
Бог даў чэлавеку Сьмерць.