Вянок (1914)/У зачараваным царстві/Зімовая дарога

Зімовая дарога
Верш
Аўтар: Максім Багдановіч
1914 год

Іншыя публікацыі гэтага твора: Зімовая дарога.

Прапануем да спампаваньня!

ЗІМОВАЯ ДАРОГА.

Шпарка коні імчацца у полі
Сумна бомы гудзяць пад дугой,
Запеваюць аб долі і волі,
Навеваюць у сэрцы спакой.

Ўюцца зьмейкай срэбрыстай дарожкі,
Брызгі золата ў небі блішчаць,
І маркотные месяца рожкі
Праз марозную мглу зіхацяць.

Поле нікне у срэбным тумане,
Сьнег блішчыць, як халодная сталь,
І лятуць мае лёгкіе сані,
Унашуся я ў сінюю даль.