Заранкі (1924)/У сонечных праменьнях

← Паляці, вецер…

У сонечных праменьнях Верш Аўтар: Янка Журба 1924 год

⁂ (Чаму мне так сумна…) →

Прапануем да спампаваньня!

У СОНЕЧНЫХ ПРАМЕНЬНЯХ.

Мы ідзём квяцістым лугам,
Пуцявінай залатой,
Удваіх — у бляску сонца —
Заадно мы з яснатой.

Ціхавейны ўецца ветрык, —
Ён ляціць да нас з палёў,
Расплятае твае косы
І сплятае іх ізноў.

Упрыгожаную блескам
Напаткалі мы раку.
Мая мілая дзяўчынка,
Пасядзім на беражку.

Тут ля рэчкі ў зеляніне
Адпачынем мы з табой;
Палюбуемся, дзяўчынка,
Мы вясеньняю красой.

Рэчка срэбрам зіхаціцца,
Хвалі шпаркія бруяць;
А ўгары над рэчкай сьветлай
Птушкі весела зьвіняць.

Вунь блакітны матылёчак
Мітусіцца над вадой…
Душу шчасьце напаўняе:
Мая мілая са мной!..