Збор твораў (Купала, 1925—1932)/I/Жалейка/Кепска…

Кепска…
Верш
Аўтар: Янка Купала
1925 год

Іншыя публікацыі гэтага твора: Кепска…

Прапануем да спампаваньня!

КЕПСКА…

Кепска, браткі, жыць нам стала!
Няма шчасьця, добрай долі;
Калі хлеб ёсьць — няма сала,
Хоць гарэлкі дык даволі.

Ой, гарэлка, як з крыніцы,
Да нас цягам прыплывае;
І п‘е кожны, ня журыцца,
Хто які грош толькі мае.

П‘юць усе, хоць бяда дома,
Хоць льлюць сьлёзы жонка, дзеці,
Хоць хлеб — зёлкі ды салома,
І таго няма у клеці…

П‘юць, хоць грош крывавым потам
На гарэлку здабываюць;
П‘юць, хоць посьле дзе пад плотам
Сваю долю праклінаюць…