Збор твораў (Купала, 1925—1932)/II/Па межах родных/Дзьве таполі

← Груша

Дзьве таполі Верш Аўтар: Янка Купала 1926 год

Лес →

Іншыя публікацыі гэтага твора: Дзьве таполі.

Прапануем да спампаваньня!

ДЗЬВЕ ТАПОЛІ

Там, за вёскай, у полі дзьве стаялі таполі,
Як адна, дзьве таполі стаялі,
І стагналі у полі сухавейна таполі,
Як адна, дзьве таполі стагналі.

Аб Усходзе у полі ўсё шумелі таполі,
Як адна, дзьве таполі шумелі,
І аб Захадзе ў полі лісьцьмі пелі таполі,
Як адна, дзьве таполі ўсё пелі.

Што пануюць у полі над дубамі таполі,
Як адна, дзьве таполі пануюць,
Што начуюць у полі самаўладна таполі,
Як адна, дзьве таполі начуюць…

Неба помсту у полі тут пачулі таполі,
Як адна, дзьве таполі пачулі,
І навекі у полі дзьве заснулі таполі,
Як адна, дзьве таполі заснулі.

---