Звон вясны (1926)/І. Плаўнік/Успаміны

← Толькі ноч

Успаміны Верш Аўтар: Ізраіль Плаўнік 1926 год

⁂ (Іграюць промені у вочах) →

Прапануем да спампаваньня!

УСПАМІНЫ…

Я сядзеў там адзінокі, —
Каля саду на мяжы…
Летні вечар павалокай
На палеткі хмель імжыў…

Там, у вёсцы у далёкай,
Што тапілася ў палёх,
На зямлі зялёнабокай
Сіні небасхіл прылёг.

Ад сьпякоты грудзей лета
Ноч купалася ў рацэ…
І прышла ты праз палетак
З васількамі у руцэ…

І прышла ты веснавіцай:
Ня прыйсьці ты не магла…
Усьміхнулася начніцай,
Засьмяялася імгла.

Я угледзіў ў тваіх вочах
Радасьць сьпелае душы…
Ты пякуча і ахвоча
Дакранулася… Ў цішы

Вусны палкія зьліліся…
Вечар хутаў нас імглой,
Цалаваўся вецер з лісьцем,
Абняліся ноч з зямлёй…

Зашаптаўся сад з палеткам, —
На узьмежку ля ральлі
Красавала шчасьця кветка —
Жыцьцё новае плялі…