З палёў Заходняй Беларусі (1927)/V/Гэкзамэтры

Гэкзамэтры
Цыкль вершаў
Аўтар: Уладзімір Жылка
1927 год

Іншыя публікацыі гэтага твора: Гекзамэтры.

Прапануем да спампаваньня!

ГЭКЗАМЭТРЫ

∗
∗ ∗

Смутак пахмуры чала не замрочыць спакушаных мудрых,
Цяжкі панурасьці грэх не зачэпіць ніколі разважных,
І абурэньне іх дух з раўнавагі ня выведзе раптам
Дзева Палада спакой іх і ціхую яснасьць вартуе.

∗
∗ ∗

Сябра, зірні — вось палёў хараство праміне і загіне;
Але вясёлай вясной красаваньне іх поўна і сьветла.
Можа таму ты й жадаеш быць толькі малюсенькай кветкай,
Польнай сьцяблінкай слабой, каб пражыць беспасрэдна і проста.

∗
∗ ∗

Звозячы ўвосень плады, што пасьпелі на дрэве і ў полі,
Ў тайны прыроды ўнікаючы, я памятаю няўхільна
Яркiх маланак агні і грымотаў працяглыя гукі,
Рэху, ўздыханьнi зямлi, iм адгучную гулка і згодна
І дабрадзейных зямельцы дажджоў ад навальніцы і бачу
Мудрасьць у гэтых праявах, у гэтым суладзьдзі адвечным.

1925 г.