Lekcyi i Evanelii na niadzieli i śviaty (1938)/I/24
| ← 23. Na III niadzielu pa Vialikadni | 24. Na IV niadzielu pa Vialikadni Урыўкі зь Бібліі 1938 год Пераклад: Адам Станкевіч |
25. Na V niadzielu pa Vialikadni → |
Прапануем да спампаваньня!
NA IV NIADZIELU PA VIALIKADNI.
I.
Darahija, usiakaje najlepšaje dareńnie i ŭsiaki daskanalny dar jość zhary, što zychodzić ad Ajca śviatła, u katoraha niama źmienności, ani cieni pieramieny. Bo z ułasnaje voli naradziŭ nas słovam praŭdy, kab my byli pačatkam jaho stvareńnia. Vy heta viedajecie, maje braty darahija. Dyk niachaj kožny čalaviek budzie achvotny słuchać, a pavolny havaryć i pavolny hnievacca. Bo hnieŭ čalavieka da spraviadlivaści Božaj nie pryčyniajecca. Dziela hetaha, adkinuŭšy ŭsiakuju niačystaść i ŭsiakuju złość, u lahodnaści prymajcie pasiejenaje słova, katoraje moža zbavić dušy vašyja.
(Jak. 1, 17—21).
II.
U heny čas skazaŭ Jezus svaim vučniam: idu da taho, katory mianie pasłaŭ i nichto z vas nia pytaje mianie, kudy idzieš? Ale zatym, što ja vam skazaŭ hetaje, sum aharnuŭ serca vašaje. Ale ja praŭdu vam kažu: dla vas karysna, kab ja adyjšoŭ, bo kali ja nie adyjdu, — Paciašyciel nia pryjdzie da vas, kali-ž adyjdu — pašlu jaho da vas. A kali pryjdzie, — prakanaje śviet ab hrachu, ab spraviadlivaści i ab sudzie: ab hrachu — bo nia ŭvieryli ŭ mianie, ab spraviadlivaści, — bo ja adyhodžu da Ajca i ŭžo nia ŭbačycie mianie, ab sudzie — bo vaładar hetaha śvietu ŭžo asudžany. Jašče maju šmat čaho vam havaryć, ale ciapier nia možacie źnieści. Kali-ž pryjdzie jon, Duch Praŭdy, navučyć vas usiakaj Praŭdy. Bo nia budzie havaryć ad siabie, ale skaža toje, što pačuje i abviaścić vam toje, što maje pryjści. Jon mianie prasłavić, bo z majho voźmie i vam abviaścić.
(Jan 16, 5—14).